95 saylı Zərdab-Kürdəmir-Ucar seçki dairəsindən namizədliyini irəli sürmüş Jalə Əliyeva bu gün Zərdab rayonunda yeni tələbə adını qazanmış bir qrup gənclərlə Heydər Əliyev Mərkəzində görüş keçirib .
Bu barədə xanım namizədin seçki qərargahından Qanunla.Az-a məlumat verilib.
İlk öncə ümummilli lider Heydər Əliyevin heykəli önünə gül dəstələri düzərək xatirəsini ehtiramla yad ediblər.
Torpaqlarımızın suverenliyi uğrunda canlarından keçmiş şəhidlərimizin xatirələri 1 dəqiqəlik sükutla yad edilib.
Xanım namizədin səlahiyyətli nümayəndələri Jalə Əliyevanın seçki platforması haqqında gənclərə geniş məlumat veriblər.
Jalə Əliyeva gənclərin göstərdiyi yüksək nəticə və əldə etdikləri uğur münasibətilə təbrik edib, Azərbaycanın gələcək qurucuları içərisində Zərdablı gənclərin ön cərgələrdə olmasını arzulayıb.
Məlumat üçün qeyd edək ki, bu il respublikanın ali məktəblərinə Zərdab rayonundan 200-dən çox gənc daxil olub. Onlardan 8 nəfəri 600-dən çox bal toplayıb. Həmin gənclərimizdə ikisi Qarabağ Universitetində təhsil alacaq. Tələbə adını qazananlardan 14-ü 500-dən, 39-u isə 400-dən çox bal toplayıb.
Tələbə adı qazanmış bütün gənclərimizi, həmçinin onların müəllimlərini, valideynlərini bir daha təbrik edir, bu rəqəmləri Zərdab təhsilinin və ümumilikdə ölkəmizdə təhsilin növbəti uğuru kimi qiymətləndiririk deyə Jalə Əliyeva bildirib.
Görüşlərdə son beş il ərzində ölkədə aparılan quruculuq işlərindən, regionların sosial-iqtisadi inkişaf proqramlarının icrasından və konkret olaraq seçki dairəsində görülmüş işlərdən geniş danışılıb. Deputatlığa namizəd seçiciləri 1 sentyabr seçkilərində fəal iştirak etməyə çağırıb.
