“UniBank” yığılmış zərərindən qurtula bilmir – HESABAT

“UniBank” 2023-cü ilin 3-cü rübünə olan hesabatını açıqlayıb. Hesabata görə bankın aktivlər cəmi 9 ay ərzində 87 milyon 167 min manat artaraq 1 milyard 527 milyon 811 min manata yüksəlib. Bu artımda əsas pay bankın kredit portfelinin üstünə düşüb. Belə ki, “UniBank”ın müştərilərinə verdiyi kreditlər 157 milyon 235 min manat artaraq 640 milyon 813 min manata çatıb.

Kommersant.az bankın hesabatına istinadən xəbər verir ki, “UniBank”ın istehlak kreditləri 93 milyon 607 min manat artaraq 640 milyon 813 min manata, biznes kreditləri 48 milyon 404 min manat artaraq 322 milyon 729 min manata, daşınmaz əmlak kreditləri isə 15 milyon 225 min manat artaraq 83 milyon 287 min manata çatıb. Mümkün zərərlər üçün yaradılan məqsədli eytiyatını 12 milyon 497 min manat artıraraq 67 milyon 13 min manata bərabər edib. Buna görə də “UniBank”ın xalis kreditləri 979 milyon 816 min manat olub. Bu da ötən ilin sonu ilə müqayisədə 144 milyon 739 min manat və ya 17.33 faiz çoxdur.

“UniBank”ın öhdəliklər cəmi 63 milyon 579 min manat artaraq 1 milyard 390 milyon 827 min manata yüksəlib. Bankın depozit portfeli 134 milyon 461 min manat artaraq 1 milyard 124 milyon 205 min manat olub. Bu artımda əsas pay fiziki şəxslərin əmanətlərinin üstünə düşüb. Belə ki, fiziki şəxslərin bankdakı əmanətlərinin həcmi 107 milyon 121 min manat artaraq 878 milyon 478 min manata çatıb. Hüquqi şəxslərin əmanətləri isə 27 milyon 339 min manat artaraq 245 milyon 727 min manata bərabərləşib.

Səhmdar kapitalını dəyişdirməyən “UniBank”ın cəmi kapitalı 23 milyon 534 min manat artaraq 136 milyon 929 min manat olub. Bank əldə etdiyi mənfəətin 1 milyon 622 min manatını ümumi ehiyatına ayırdığı üçün yığılmış zərərini 21 milyon 912 min manat azaldaraq 13 milyon 127 min manata endirib.

“UniBank”ın faiz gəliri ötən ilin eyni rübü ilə müqayisədə 37 milyon 406 min manat artaraq 154 milyon 866 min manata yüksəlib. Bankın faiz xərcləri isə 11 milyon 569 min manat artaraq 52 milyon 491 min manata çatıb. Buna görə də bank xalis faiz gəliri 97 milyon 580 min manat olub ki, bu da ötən ili müvafiq dövrü ilə müqayisədə 23 milyon 337 min manat və ya 31.43 faiz çoxdur.

Bankın qeyri-faiz gəliri 32 milyon 404 min manat artaraq 77 milyon 785 min manata, qeyri-faiz xərcləri isə 22 milyon 354 min manat artaraq 126 milyon 285 min manata bərabərləşib. Nəticədə “UniBank”ın əməliyyat mənfəəti 33 milyon 387 min manat artaraq 49 milyon 80 min manata çatıb.

Bank ötən ilin eyni rübündə əldə etdiyi zərəri bu ilin 3-cü rübündə mənfəətlə əvəz edib. Belə ki, bankın mənfəəti 21 milyon 907 min manat olub ki, bu da ötən ilin 3-cü rübü ilə müqayisədə 22 milyon 484 min manat çoxdur.

Qeyd edək ki, “UniBank”ın məcmu kapitalı 1 il ərzində 29 milyon 945 min manat artaraq 151 milyon 903 min manata yüksəlib.