Milli Qurtuluş Günü Azərbaycanın müasir tarixində dönüş nöqtəsidir
Milli Qurtuluşdan sonra Azərbaycanın qarşısında duran əsas vəzifələrdən biri də güclü ordu quruculuğu idi. Uzun illər ərzində həyata keçirilən məqsədyönlü siyasət nəticəsində Azərbaycan Ordusu regionun ən güclü ordularından birinə çevrildi.
Ordunun maddi-texniki bazası gücləndirildi, hərbi qulluqçuların sosial müdafiəsi yaxşılaşdırıldı, müasir silah və texnika ilə təchizat təmin edildi. Eyni zamanda gənclərin vətənpərvərlik ruhunda tərbiyəsinə xüsusi diqqət yetirildi.
Bütün bunların nəticəsi olaraq Azərbaycan Ordusu 2020-ci ilin 44 günlük Vətən müharibəsində tarixi Zəfər qazandı. Prezident, Ali Baş Komandan İlham Əliyevin rəhbərliyi ilə ordumuz işğal altında olan torpaqlarımızın böyük hissəsini azad etdi. Azərbaycan xalqı uzun illər gözlədiyi qələbəyə qovuşdu.
2023-cü ildə həyata keçirilən lokal xarakterli antiterror tədbirləri nəticəsində ölkəmizin suverenliyi tam bərpa edildi və Azərbaycanın bütün ərazisində dövlət hakimiyyəti təmin olundu.
Bu gün Azərbaycan yeni inkişaf mərhələsinə qədəm qoyub. İşğaldan azad edilmiş ərazilərdə genişmiqyaslı bərpa və yenidənqurma işləri aparılır. Yeni şəhər və kəndlər salınır, yollar, hava limanları, məktəblər, xəstəxanalar tikilir. Qarabağ və Şərqi Zəngəzur bölgələri yenidən dirçəlir.
Eyni zamanda ölkəmiz iqtisadiyyatın şaxələndirilməsi, qeyri-neft sektorunun inkişafı, rəqəmsal texnologiyaların tətbiqi və insan kapitalının gücləndirilməsi istiqamətində mühüm addımlar atır. Azərbaycanın beynəlxalq nüfuzu ildən-ilə artır, ölkəmiz regional və qlobal təşəbbüslərdə fəal iştirak edir.
Milli Qurtuluş Günü Azərbaycanın müasir tarixində dönüş nöqtəsidir. Məhz 1993-cü ildə əldə olunan siyasi sabitlik və dövlətçilik ənənələrinin möhkəmləndirilməsi sonrakı inkişafın əsasını təşkil etmişdir. Bu yol ölkəmizi güclü dövlətə çevirmiş, iqtisadi tərəqqi, beynəlxalq nüfuz və hərbi qüdrət qazandırmışdır.
Bu gün Azərbaycan xalqı qürurla deyə bilər ki, Milli Qurtuluşdan başlayan yol tarixi Zəfərlə nəticələnmişdir. Qarşıda duran əsas vəzifə isə əldə olunan nailiyyətləri qorumaq, ölkəmizin daha da güclənməsinə və gələcək nəsillərə daha firavan Azərbaycan miras qoyulmasına töhfə verməkdir. Milli Qurtuluşdan Zəfərə uzanan bu yol Azərbaycan dövlətinin gücünün, xalqımızın birliyinin və müstəqilliyə sadiqliyinin parlaq nümunəsidir.
Gülnaz Məmmədova – Zərdab şəhər sakini, təqaüdçü
