Yeganə Ümid və Çıxış Yolu – Heydər Əliyev
Azərbaycan xalqının müstəqillik tarixində 1990-cı illərin əvvəlləri ən mürəkkəb və taleyüklü dövrlərdən biri kimi yadda qalmışdır. Müstəqilliyini yenicə bərpa etmiş ölkədə siyasi qeyri-sabitlik, iqtisadi böhran, idarəetmədə səriştəsizlik və Ermənistanın hərbi təcavüzü dövlətçiliyin gələcəyini ciddi təhlükə altına salmışdı. Həmin dövrdə ölkədə baş verən hadisələr xalqı dərin narahat edir, Azərbaycanı parçalanmaq və müstəqilliyini itirmək təhlükəsi ilə üz-üzə qoyurdu.
1992–1993-cü illərdə hakimiyyətdə olan AXC-Müsavat iqtidarı ölkədə yaranmış ağır vəziyyəti idarə etməkdə aciz qalmışdı. Dövlət idarəçiliyində təcrübəsizlik, daxili çəkişmələr və siyasi qarşıdurmalar ölkədə vəziyyəti daha da gərginləşdirirdi. Müxtəlif silahlı qrupların fəaliyyət göstərməsi, mərkəzi hakimiyyətə tabe olmaması və ölkənin müxtəlif bölgələrində yaranan gərginlik dövlətçiliyin əsaslarını sarsıdırdı. Ermənistanın işğalçılıq siyasəti nəticəsində torpaqların itirilməsi isə vəziyyəti daha da ağırlaşdırırdı.
Belə bir şəraitdə Azərbaycan xalqı ölkəni bu böhrandan çıxara biləcək qüdrətli liderə ehtiyac duyurdu. Xalqın böyük əksəriyyəti ümidini dövlət idarəçiliyi sahəsində zəngin təcrübəyə malik olan Heydər Əliyevə bağlamışdı. İnsanlar yaxşı anlayırdılar ki, ölkəni düşdüyü ağır vəziyyətdən yalnız uzaqgörən siyasətçi, güclü dövlət xadimi və milli maraqları hər şeydən üstün tutan lider xilas edə bilər.
1993-cü ilin iyun hadisələri zamanı ölkədə vətəndaş qarşıdurması təhlükəsi daha da artmışdı. Mövcud hakimiyyət yaranmış vəziyyətə nəzarət edə bilmir, dövlət idarəçiliyi faktiki olaraq iflic vəziyyətinə düşürdü. Belə bir məqamda xalqın təkidli tələbi ilə Heydər Əliyev Bakıya dəvət olundu. Dövlətçilik anlayışını dərindən mənimsəmiş, siyasi təcrübəsi və qətiyyəti ilə seçilən Heydər Əliyev xalqın etimadını doğruldaraq ölkənin xilası missiyasını öz üzərinə götürdü.
Heydər Əliyevin hakimiyyətə qayıdışı ilə Azərbaycanda sabitliyin bərpası istiqamətində mühüm addımlar atıldı. Dövlət çevrilişi və vətəndaş müharibəsi təhlükəsinin qarşısı alındı, qanunsuz silahlı birləşmələr zərərsizləşdirildi və dövlət hakimiyyəti möhkəmləndirildi. Qısa müddət ərzində ölkədə ictimai-siyasi sabitlik təmin olundu və dövlət quruculuğu prosesinə start verildi.
Ümummilli Liderin həyata keçirdiyi uzaqgörən siyasət nəticəsində Azərbaycan beynəlxalq aləmdə etibarlı tərəfdaş kimi tanınmağa başladı. İqtisadi islahatlar həyata keçirildi, xarici investisiyalar cəlb olundu və ölkənin inkişafının əsasları formalaşdırıldı. Azərbaycanın gələcək tərəqqisinin təməlində məhz həmin dövrdə atılmış addımlar dayanır.
Bu gün Azərbaycanın qazandığı uğurlar, əldə etdiyi siyasi sabitlik və iqtisadi inkişaf bir daha göstərir ki, 1993-cü ildə xalqın seçimi düzgün olmuşdur. Heydər Əliyevin xilaskarlıq missiyası Azərbaycan dövlətçiliyinin qorunub saxlanılmasında və möhkəmləndirilməsində həlledici rol oynamışdır.
Nəticə etibarilə, ölkənin ən ağır günlərində Azərbaycan xalqının yeganə ümidi və çıxış yolu Heydər Əliyev olmuşdur. Onun qətiyyətli fəaliyyəti, siyasi müdrikliyi və dövlətçilik təcrübəsi Azərbaycanı böhrandan çıxarmış, müstəqilliyin qorunmasına və güclü dövlətin formalaşmasına imkan yaratmışdır. Buna görə də Heydər Əliyevin adı xalqımızın yaddaşında xilaskar lider və müasir Azərbaycan dövlətinin qurucusu kimi əbədi yaşayır.
Rövşən Qocayev – Zərdab şəhər sakini, fəal gənc, tələbə
