Nə yatmısan , qoca vulkan, səninləyəm,
Ayağa dur , Azərbaycan , səninləyəm!
Ruhu şad olsun , əvəzolunmaz şairim , Məmməd Araz!
Qoca Vulkan oyandı! Oyandı , nə oyandı!
Bir yumruğa döndü Azərbaycan. Dəmir bir yumruğa!
O möhtəşəm 44 gündə bütün dünyaya milli mənliyini , kimliyini sübut etdi. Etdi ki Koroğlular , Babəklər, Cavanşirlər, Həzilər yurdu sahibsiz deyil, başsız deyil.Bu qədim yurdda İlham Əliyev kimi başçı da var ,baş da. Hələ üstəlik yağı düşmənə qan udduran yüzlərlə , minlərlə şirürəkli oğullar da! Zalımların üzərinə qara bulud kimi çökən nər oğullar! Qanları ilə zəfər tarixi yazan oğullar!
Cabir Novruz necə gözəl demiş;
Millət əzər , əzilər də
Kaş millətdə ruh yaşasın !
Əyri qəddi düzələr də
Kaş millətdə ruh yaşasın!
Siz, təkcə torpaqlarımızı qaytarmadınız. Öləzimiş ruhumuzu , sındırılmış qürurumuzu , tapdalanmış namusumuzu , şərəfimizi qaytardınız!Bizə bizi qaytardınız!
Sevinc, kədər , qürur , təəssüf-bütün hisslər qarışıb bir- birinə.
Sevinirik , qürurdan köksümüz qabarır. Xəzər boyda bayrağımız dalğalanır, Qarabağ ellərində.
Kədərlənirik, qəlbimizdən qara qanlar axır.Gözüyaşlı analar , bacılar , gəlinlər, körpələr, yarımçıq qalan arzular…. Və bəlkə də reallaşan arzular.
Öz toyunda bayrağa bürünüb torpağa tapşırılmaq arzusuna çatan Pəncəlimiz , dastana dönən Xudayarımız , Poladımız, Mübarizimiz , Talehimiz, yüzlərlə , minlərlə nurüzlü şəhidlərimiz! Torpağı qanı ilə suvaran qazilərimiz! SİZ AZƏRBAYCANSINIZ!
Fəzail Ağamalı
Milli Məclisin deputatı Ana Vətən partiyasının sədri