Güləş Azərbaycanda dərin köklərə malik olan və milli ənənələrə söykənən idman növüdür
Azərbaycan bu gün beynəlxalq aləmdə yalnız iqtisadi və siyasi gücü ilə deyil, həm də idman sahəsində qazandığı mühüm nailiyyətlərlə seçilən ölkələrdən biridir. Tiranada keçirilən Avropa çempionatında milli güləş komandamızın həm sərbəst, həm də yunan-Roma növləri üzrə komanda hesabında birinci yerə yüksəlməsi bunun bariz nümunəsidir. Bu qələbə Azərbaycan idmanının gücünü və davamlı inkişafını bir daha nümayiş etdirdi.
Cənab İlham Əliyev tərəfindən qalib idmançıların qəbul edilməsi zamanı səsləndirilən fikirlər ölkədə idmana göstərilən diqqət və qayğının yüksək səviyyədə olduğunu bir daha təsdiqlədi. Bu yanaşma idmanın təkcə fiziki fəaliyyət kimi deyil, həm də milli ruhun, vətənpərvərlik hissinin formalaşmasında mühüm rol oynadığını göstərir.
Güləş Azərbaycanda dərin köklərə malik olan və milli ənənələrə söykənən idman növüdür. Bu sahədə əldə olunan uğurlar sistemli fəaliyyətin nəticəsidir. Məşq prosesinin düzgün təşkili, istedadlı idmançıların vaxtında aşkar olunması və təcrübəli mütəxəssislərin yetişdirilməsi uğurların əsasını təşkil edir. Keçmişin tanınmış çempionlarının bu gün məşqçi və rəhbər vəzifələrdə çalışması isə idmanda varisliyin qorunmasına və təcrübənin ötürülməsinə şərait yaradır.
İdman cəmiyyət həyatının mühüm tərkib hissəsi olmaqla yanaşı, gənc nəslin formalaşmasında da əhəmiyyətli rol oynayır. Beynəlxalq yarışlarda Azərbaycan bayrağının ucaldılması və dövlət himninin səsləndirilməsi xalqda qürur hissi doğurur. Bu mənada idmançılar yalnız yarış iştirakçıları deyil, həm də ölkənin simasını təmsil edən şəxslərdir.
Eyni zamanda, idmançıların yalnız nəticələri deyil, onların davranışları və mənəvi keyfiyyətləri də önəmlidir. Əsl çempionluq həm də nümunəvi vətəndaş olmaqla ölçülür. Bəzi hallarda beynəlxalq yarışlarda müşahidə olunan qeyri-obyektiv yanaşmalar idmançılarımızın əzmini qıra bilmir. Onlar həm peşəkarlıq, həm də yüksək mədəniyyət nümayiş etdirərək bu kimi hallara layiqli cavab verirlər.
Ölkədə idmanın inkişafı dövlət siyasətinin prioritet istiqamətlərindən biridir. Müasir idman infrastrukturu, bölgələrdə fəaliyyət göstərən Olimpiya kompleksləri və ixtisaslaşmış zallar idmanın kütləviliyini təmin edir. Sevindirici haldır ki, son illərdə qadınların da güləşə marağı artmış, onlar da beynəlxalq arenalarda uğurlar qazanmağa başlamışlar.
Azərbaycan idmanı bu gün yalnız nailiyyətləri ilə deyil, həm də sistemli inkişaf modeli, güclü ənənələri və yüksək mənəvi dəyərləri ilə seçilir. Bu uğurların davamlı olması isə gələcək nəsillər üçün möhkəm zəmin yaradır.
Abdulbağı Fazilli – Zərdab şəhər sakini, fəal gənc
