Ukrayna Dövlət İstintaq Bürosunun müstəntiqləri Ukrayna və Rusiya arasında Rusiya Federasiyasının Qara dəniz donanmasının mövcudluğu haqqında sazişin hazırlanması, təsdiqi, imzalanması, ratifikasiyası və icrası zamanı iki keçmiş nazirin dövlətə xəyanətdə ittiham olunması üçün sübutlar toplayıblar.
Qanunla.Az xəbər verir ki, bu barədə idarənin mətbuat xidmətindən məlumat verilib.
“Ukraynanın keçmiş ədliyyə nazirinə Olexandr Lavrynovyc və keçmiş xarici işlər naziri Kostyantin Qrışçenko dövlətə qarşı xəyanətdə ittiham olunurlar”, – deyə məlumatda qeyd olunub.
İbtidai istintaq müəyyən edib ki, Ukrayna və Rusiya arasında Rusiya Federasiyasının Qara dəniz donanmasının Ukrayna ərazisində olması məsələsinə dair sazişin məzmunu və şərtləri o zaman Rusiya Federasiyasının prezidenti olan Dmitri Medvedev tərəfindən qoyulub.
“Bu müqavilənin imzalanmasının nəticələrini tam dərk edən Ukraynanın keçmiş baş naziri və cəlb edilmiş nazirlər Rusiyanın Qara dəniz donanmasının Ukrayna ərazisində mövcudluğunun 25 il müddətinə uzadılmasına şərait yaratdılar. Bu, 2014-cü ildə Krım Respublikasının və Sevastopolun ilhaqı zamanı istifadə edilən təcavüzkar dövlətin silahlı qüvvələrinin hərbi texnikası və şəxsi heyətinin artmasına kömək etdi”, – departament qeyd edib.
Keçmiş nazirlər bu sazişin layihəsinin, xüsusən Nazirlər Kabinetinin onun təsdiq edilməsi haqqında sərəncamının və bu sazişin ratifikasiyası haqqında Ukrayna Qanununun layihəsinin hazırlanmasında iştirak ediblər.
Belə ki, eks-nazirlər dövlətə xəyanətdə – Ukraynanın suverenliyinə, ərazi bütövlüyünə və toxunulmazlığına, müdafiə qabiliyyətinə, dövlət və iqtisadi təhlükəsizliyinə zərər vurmaqla Rusiya Federasiyasının maraqlarından çıxış etməkdə şübhəli bilinirlər.
Xatırladaq ki, mayın 23-də Kiyevin Peçersk rayon məhkəməsi keçmiş prezident Viktor Yanukoviçin 2010-cu ildə Xarkov sazişləri adlanan müqavilələrin imzalanması işi üzrə həbsinə icazə verib.
İstintaqın müəyyən etdiyi kimi, Yanukoviç Ukraynanın keçmiş baş naziri Nikolay Azarovla əlbir olaraq “xarici dövlətə – Rusiya Federasiyasına və onun nümayəndələrinə Ukraynaya qarşı təxribat fəaliyyətinin həyata keçirilməsində yardım göstərib”.
2010-cu il aprelin 21-də keçmiş qaçaq prezident Viktor Yanukoviç Xarkovda olarkən Ukrayna adından Ukrayna ilə Rusiya Federasiyası arasında Saziş imzalayıb. Bu sənəd Rusiya Federasiyasının Qara dəniz donanmasının Sevastopolda qalma müddətini 25 il uzadıb.
İddialara görə, o, təbii qaza güzəşt almaq bəhanəsi ilə bunu edib. Əslində, o, süni şəkildə Rusiya qoşunlarının sayını artırmaq üçün ilkin şərtləri və onların Ukrayna ərazisində qalması üçün şərait yaradıb.
20 fevral 2014-cü il tarixindən etibarən Rusiya Qara Dəniz Donanmasının hərbçiləri Rusiya Federasiyası Silahlı Qüvvələrinin digər bölmələri ilə qarşılıqlı əlaqədə olaraq Krım yarımadasının hərbi işğalını və sonradan ilhaqını həyata keçiriblər.
