Avropa İttifaqı regionda artan gərginlik şəraitində Ermənistanı Rusiyanın orbitindən çıxarmağa və iqtisadiyyatına dəstək verməyə kömək edəcək mühüm plan üzərində razılaşıb.
Qanunla.Az “Politico” nəşrinə istinadən xəbər verir ki, razılaşma dünən Brüsseldə Avropa Komissiyasının sədri Ursula fon der Leyen, ABŞ dövlət katibi Antoni Blinken və Ermənistanın baş naziri Nikol Paşinyan arasında danışıqlardan sonra əldə olunub.
Üçtərəfli sammitdən sonra jurnalistlərə açıqlama verən fon der Leyen Aİ-nin “yeni və iddialı tərəfdaşlıq gündəliyi” çərçivəsində növbəti dörd il ərzində Cənubi Qafqaz ölkəsində biznes və sənayeni dəstəkləmək üçün 270 milyon avro ayıracağını bildirib.
“Rusiyanın başçılıq etdiyi KTMT hərbi alyansındakı üzvlüyünü faktiki olaraq dayandıran Ermənistan ABŞ qoşunlarını ölkədə təlim keçməyə dəvət etdi, Ukraynaya yardım göndərdi və hətta Aİ-yə daxil olmağa cəhd edə biləcəyini təklif etdi”, – deyə nəşr yazıb.
Görüşdən əvvəl Ermənistan Aİ və ABŞ rəsmilərinə Azərbaycanın İsrail və Pakistan kimi ölkələrdən aldığı hərbi texnika ehtiyatı saxladığını bildirən sənədləri təqdim edib: “Ermənistan iddia edir ki, qonşusuna ilin əvvəlindən bəri orta hesabla gündə birdən çox silah təhvil verilib”.
