Müasir dövrdə qlobal siyasi və iqtisadi proseslərin sürətlə dəyişdiyi bir mərhələdə Azərbaycan Respublikasının beynəlxalq münasibətlər sistemində tutduğu mövqe, həyata keçirdiyi siyasət və əldə etdiyi uğurlar hər bir vətəndaş üçün, xüsusilə də gənc nəslin formalaşması baxımından böyük əhəmiyyət kəsb edir. Bu baxımdan İlham Əliyev tərəfindən həyata keçirilən ardıcıl və məqsədyönlü siyasət ölkəmizin həm regionda, həm də beynəlxalq miqyasda nüfuzunun artmasına mühüm töhfələr verir. 2026-cı il mayın 4-də “Avropa Siyasi Birliyi”nin 8-ci Zirvə toplantısında videobağlantı formatında səsləndirilən fikirlər də Azərbaycanın sülhə, əməkdaşlığa və dayanıqlı inkişafa sadiqliyinin bariz nümunəsi kimi diqqət çəkir.
Son illərdə regionda baş verən dəyişikliklər fonunda Azərbaycan sülh təşəbbüsləri ilə çıxış edərək sabitliyin təmin olunmasına yönəlmiş mühüm addımlar atmışdır. Xüsusilə Ermənistan ilə münasibətlərin normallaşdırılması istiqamətində əldə edilən irəliləyişlər və qarşılıqlı etimadın formalaşması gələcəyə nikbin baxış yaradır. Azərbaycan ərazisindən Ermənistana humanitar və iqtisadi yüklərin daşınması, tranzit məhdudiyyətlərinin aradan qaldırılması və enerji məhsullarının ixracı kimi addımlar regionda yeni əməkdaşlıq mərhələsinin əsasını qoyur. Bu faktlar bir daha sübut edir ki, ölkəmiz yalnız sözlə deyil, əməli fəaliyyətlə də sülhün tərəfdarıdır .
Eyni zamanda Azərbaycanın beynəlxalq platformalarda balanslı və prinsipial mövqe sərgiləməsi xüsusi vurğulanmalıdır. “Avropa Siyasi Birliyi” çərçivəsində irəli sürülən təşəbbüslər, o cümlədən 2028-ci ildə Zirvə görüşünün Azərbaycanda keçirilməsi təklifi ölkəmizin artan diplomatik nüfuzunun göstəricisidir. Bu təşəbbüsün dəstəklənməsi, o cümlədən Ermənistan tərəfindən qəbul edilməsi regionda yeni siyasi reallıqların formalaşdığını və qarşılıqlı anlaşmanın mümkün olduğunu nümayiş etdirir. Bu cür addımlar həm də gənc nəslə sülh, tolerantlıq və əməkdaşlıq dəyərlərinin aşılanması baxımından mühüm əhəmiyyət daşıyır.
Bununla yanaşı, bəzi beynəlxalq qurumların ikili standartlara əsaslanan yanaşmaları da diqqətdən kənarda qalmır. Azərbaycan öz ərazi bütövlüyünü və suverenliyini bərpa etdikdən sonra müəyyən dairələrin qərəzli mövqe sərgiləməsi ölkəmizin haqq işinə kölgə sala bilməz. Əksinə, bu cür yanaşmalar Azərbaycan dövlətinin daha da güclənməsinə, müstəqil siyasət yürütməsinə və milli maraqlarını qətiyyətlə müdafiə etməsinə stimul verir. Bu kontekstdə ölkəmizin prinsipial mövqeyi, beynəlxalq hüquqa əsaslanan siyasəti və milli maraqlara sadiqliyi xüsusi qeyd olunmalıdır .
Təhsil müəssisələri olaraq bizim əsas vəzifəmiz bu reallıqları gənc nəslə düzgün şəkildə çatdırmaq, onları vətənpərvərlik ruhunda tərbiyə etmək və müasir dünyada baş verən prosesləri dərindən anlayan vətəndaşlar kimi formalaşdırmaqdır. Şagirdlərimiz yalnız akademik biliklərlə deyil, həm də siyasi, sosial və mənəvi dəyərlərlə silahlanmalıdırlar. Bu baxımdan ölkəmizin beynəlxalq uğurlarının, sülh təşəbbüslərinin və inkişaf strategiyasının tədris prosesində əks olunması mühüm əhəmiyyət kəsb edir.
Azərbaycanın sülhə sadiqliyi, regional əməkdaşlığa verdiyi töhfələr və beynəlxalq aləmdə artan rolu gələcək nəsillər üçün möhkəm bir inkişaf platforması yaradır. Bu gün məktəblərdə təhsil alan şagirdlər sabahın qurucuları kimi bu siyasətin davamçıları olacaq, ölkəmizin inkişafında fəal rol oynayacaqlar. Onların milli dəyərlərə bağlı, geniş dünyagörüşlü və məsuliyyətli vətəndaşlar kimi yetişməsi isə bizim üzərimizə düşən ən mühüm vəzifədir.
Nəticə etibarilə, Azərbaycan Respublikasının həyata keçirdiyi sülh və inkişaf siyasəti yalnız bugünkü reallıqları deyil, həm də gələcək perspektivləri müəyyənləşdirir. Bu siyasətin əsasını təşkil edən sabitlik, əməkdaşlıq və qarşılıqlı hörmət prinsipləri gənc nəslin formalaşmasında mühüm rol oynayır. Təhsil ocaqları olaraq biz də bu dəyərlərin təbliğinə və gələcək nəsillərin bu ruhda yetişdirilməsinə daim töhfə verməliyik.
Dərya Əhmdova
Şıxbağı kənd tam orta ümumtəhsil məktəbin direktoru
