Bizim bayrağımız qaldırılanda bütün Azərbaycan xalqı qürur hissi keçirir, sevinir
İlham Əliyev tərəfindən Avropa çempionatında komanda hesabında çempion olan güləşçilərin qəbul edilməsi Azərbaycan idmanının inkişafında mühüm hadisələrdən biri kimi yadda qaldı. Bu görüş yalnız uğurun qeyd olunması deyil, həm də idmanın cəmiyyət həyatındakı rolunun bir daha vurğulanması idi.
Prezident çıxışında xüsusi olaraq qeyd etdi ki, beynəlxalq arenada Azərbaycan bayrağı ucaldıqda bu, təkcə idmançıların deyil, bütün xalqın qələbəsi kimi qəbul olunur. Bu anlar ölkədə milli birliyin, qürur hissinin güclənməsinə xidmət edir. İdmançıların qazandığı nailiyyətlər cəmiyyətə sevinc bəxş etməklə yanaşı, gənc nəslin vətənpərvərlik ruhunda yetişməsində mühüm rol oynayır.
Azərbaycanın idman siyasətində diqqət çəkən əsas məqamlardan biri də təcrübənin nəsildən-nəslə ötürülməsidir. Bu gün federasiya rəhbərliyində və məşqçi heyətində vaxtilə böyük uğurlar qazanmış, Olimpiya və dünya çempionatlarında fərqlənmiş idmançıların yer alması bu siyasətin bariz nümunəsidir. Vaxtilə arenalarda mübarizə aparan bu şəxslər indi yeni nəsil idmançıların yetişməsinə töhfə verir. Beləliklə, idmanda davamlılıq təmin olunur və uğurlar silsilə xarakter daşıyır.
Son illərdə ölkənin müxtəlif bölgələrində tikilən Olimpiya İdman kompleksləri və müasir güləş zalları idmanın kütləviliyini artırıb. Regionlardan olan gənclərin məşqlərə və təlim-məşq toplanışlarına cəlb olunması seleksiya prosesini gücləndirir. Bu isə gələcək uğurlar üçün möhkəm zəmin yaradır. Güləş kimi ənənəvi idman növündə Azərbaycanın mövqeyinin daha da güclənməsi məhz bu sistemli yanaşmanın nəticəsidir.
Nəticə etibarilə, nəsillər dəyişsə də, Azərbaycan idmanının uğurları dəyişməz qalır. Bu uğurlar dövlət dəstəyi, peşəkar yanaşma və idmançıların əzmi sayəsində daha böyük zirvələrə doğru davam edir.
Aqil Mehdiyev – Zərdab rayonu Alıcanlı kənd sakini
