Torpaqlarımızın işğaldan azad olunması zamanı hərbi əməliyyatlarda iştirak edərək igidlik və şücaət nümayiş etdirmiş, vəzifə borcunu ləyaqətlə və vicdanla, döyüş tapşırıqlarını uğurla yerinə yetirmiş Silahlı Qüvvələrimizin hərbi qulluqçuları Prezident, Müzəffər Ali Baş Komandan İlham Əliyevin sərəncamları ilə medal və vəsiqələrlə təltif olunublar.Vətən müharibəsi iştirakçılarına medal və onların vəsiqələrinin təqdim edilməsi münasibəti ilə Səfərbərlik və Hərbi Xidmətə Çağırış üzrə Dövlət Xidmətinin Zərdab rayon şöbəsində tədbir keçirilib.
Qanunla.Az xəbər verir ki,tədbirdə rayon İcra Hakimiyyətinin məsul şəxsləri,Səfərbərlik və Hərbi Xidmətə Çağırış üzrə Dövlət Xidmətinin Zərdab rayon şöbəsinin rəisi polkovnik leytenant Asif Əhədov, Vətən muharibəsi iştirakçıları və şəhid ailələri ilə işin təşkili şöbəsinin müdiri polkovnik leytenant Zinhar Bayramov, Vətən müharibəsi şəhidlərinin ailə üzvləri, Vətən müharibəsi iştirakçıları iştirak ediblər.
İlk öncə Vətən torpaqlarının işğaldan azad olunması uğrunda həlak olmuş şəhidlərin xatirəsi 1 dəqiqəlik sükutla yad edildi.
Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Zərdab rayon şöbəsinin rəisi, polkovnik leytenant Asif Əhədov Ali Baş Komandan cənab İlham Əliyevin qətiyyətli rəhbərliyi ilə torpaqlarımızın işğaldan azad olunması uğrunda Vətən müharibəsində şəhid olanlara Allahdan rəhmət, qazilərimizə şəfa diləyib, belə qəhrəman övladlar yetişdirdikləri üçün ailələrinə minnətdarlığını bildirərək hər zaman onların yanlarında olduqlarını vurğulayıb.
Rayon üzrə Azərbaycan Respublikası ərazilərinin işğaldan azad edilməsi uğrunda aparılan döyüş əməliyyatlarında iştirak etmiş, şəhid olmuş, Azərbaycan Respublikası Prezidenti tərəfindən təltif edilmiş 14 nəfərə verilən medal və onların vəsiqələri təltif olunanların özlərinə və şəhid gizir Ağayev İlkin Tehran oğlunun övladına təqdim edildi.
Səmimi keçən görüşün sonunda şəhid ailələri və müharibə iştirakçıları Müzəffər Ali Baş Komandan cənab İlham Əliyev və Azərbaycan Respublikasının Birinci vitse-prezidenti Mehriban xanım Əliyeva tərəfindən onlara göstərilən qayğı və diqqətə görə minnətdarlıqlarını bildiriblər.
Qeyd edək ki, Vətən müharibəsi iştirakçıları ”Suqovuşanın azad olunmasına görə”,”Ağdamın azad olunmasına görə”,”Laçının azad olunmasına görə” və ”Qubadlının azad olunmasına görə” medal və vəsiqələrlə təltif olunublar.
Qanunla.Az
Vüqar Rəhimov
