Xəbər verdiyimiz kimi, Ukrayna Prezident Administrasiyasının rəhbəri Andrey Yermak aylarla davam edən beynəlxalq narazılıqlar fonunda istefa verib.
Qanunla/az-un məlumatına görə, The Telegraph yazır ki, Qərb tərəfdaşları Yermakın davranışlarından ciddi şəkildə narazı idi və bu narazılıq uzun müddətdir artmaqda idi.
Başlıca detallar:
– ABŞ rəsmiləri Yermakı “qəfil və dağıdıcı” fiqur hesab edirdilər. Bir yüksək vəzifəli mənbə onun hər iki siyasi tərəfi qıcıqlandıran şəxs olduğunu bildirib.
– Yermakın Donald Trampın Oval Ofisdə baş tutan uğursuz görüşündəki rolu Kiyev–Vaşinqton münasibətlərinə ciddi zərbə vurub. O, görüş zamanı Trampa Ukraynada aclıq çəkən məhbusların narahatedici görüntülərini göstərməklə vəziyyəti daha da gərginləşdirib.
– Həmin görüşdən sonra Tramp administrasiyasının rəsmiləri Prezident Zelenskiyə Yermakı vəzifədən uzaqlaşdırmağı tövsiyə ediblər. Səbəb kimi həm diplomatik səhvləri, həm də Yermakın ingilis dilinə zəif bələd olduğu üçün tərcüməçiyə həddən artıq bağlılığı göstərilib.
Qeyd edək ki, Yermakın istefası Kiyevdə siyasi dinamikanın dəyişdiyinin və Qərbin artan təzyiqlərinin nəticə verməyə başladığının göstəricisi kimi dəyərləndirilir.
