Vitse-prezident Vensin bugünkü səfəri imzalanmış Strateji Xartiya, danışıqların mahiyyəti baxımından tarixidir.
Azərbaycan Respublikasının beynəlxalq münasibətlər sistemində mövqeyinin möhkəmlənməsi, strateji tərəfdaşlıq əlaqələrinin genişlənməsi və milli maraqların qətiyyətlə təmin olunması son illərdə həyata keçirilən ardıcıl və məqsədyönlü siyasətin nəticəsidir. Bu baxımdan Amerika Birləşmiş Ştatlarının Vitse-prezidenti Vensin ölkəmizə səfəri və imzalanmış Strateji Xartiya xüsusi tarixi əhəmiyyət kəsb edir.
Cənab Prezident İlham Əliyevin rəhbərliyi ilə Azərbaycan artıq regionun deyil, daha geniş coğrafiyanın əsas siyasi və iqtisadi aktorlarından birinə çevrilmişdir. ABŞ kimi dünyanın ən qüdrətli dövlətlərindən biri ilə münasibətlərin strateji tərəfdaşlıq səviyyəsinə yüksəlməsi məhz bu uğurlu və uzaqgörən siyasətin nəticəsidir.
İmzalanmış Strateji Xartiya iki ölkə arasında əməkdaşlığın yeni mərhələyə qədəm qoyduğunu nümayiş etdirir. Bu sənəddə təhlükəsizlik, antiterror mübarizəsi, enerji, nəqliyyat, müdafiə sənayesi, yüksək texnologiyalar və süni intellekt sahələrində əməkdaşlığın genişləndirilməsi öz əksini tapmışdır. Bu isə o deməkdir ki, Azərbaycan-ABŞ münasibətləri artıq təkcə siyasi dialoq çərçivəsində deyil, çoxşaxəli və institusional əsaslar üzərində qurulur.
Cənab Prezident İlham Əliyevin həyata keçirdiyi balanslı xarici siyasət nəticəsində Azərbaycan bu gün həm Şərqlə, həm də Qərblə etibarlı tərəfdaş münasibətləri qurmağı bacaran nadir dövlətlərdəndir. ABŞ ilə imzalanmış Strateji Xartiya ölkəmizin beynəlxalq nüfuzunun və etibarlılığının bariz göstəricisidir. Azərbaycan artıq regional təşəbbüslərin iştirakçısı deyil, təşəbbüskar və istiqamətverici tərəf kimi çıxış edir.
Enerji təhlükəsizliyi məsələsində ölkəmizin rolu xüsusilə diqqətəlayiqdir. Bu gün Azərbaycan öz təbii qazı ilə 16 ölkənin enerji təhlükəsizliyini təmin edir. Onların 11-i NATO-nun üzvüdür və ABŞ-ın yaxın müttəfiqləridir. Bu fakt Azərbaycanın yalnız enerji ixrac edən ölkə olmadığını, həm də Avropa və transatlantik məkan üçün strateji təhlükəsizlik təminatçısına çevrildiyini göstərir. Cənab Prezident İlham Əliyevin enerji diplomatiyası nəticəsində ölkəmiz etibarlı tərəfdaş imici qazanmışdır.
Təhlükəsizlik və antiterror sahəsində əməkdaşlıq da mühüm əhəmiyyət daşıyır. Azərbaycan beynəlxalq terrorizmə qarşı mübarizədə hər zaman prinsipial mövqe sərgiləmiş, qlobal təhlükəsizlik təşəbbüslərində fəal iştirak etmişdir. Bu sahədə ABŞ ilə əməkdaşlığın genişlənməsi regionda sabitliyin möhkəmlənməsinə əlavə töhfə verəcəkdir.
TRIPP layihəsi və digər nəqliyyat təşəbbüsləri isə regionda sülhün və iqtisadi inteqrasiyanın inkişafına xidmət edir. Azərbaycan artıq Şərq-Qərb və Şimal-Cənub nəqliyyat dəhlizlərinin əsas halqasına çevrilmişdir. Cənab Prezident İlham Əliyevin təşəbbüsü ilə həyata keçirilən infrastruktur layihələri ölkəmizi mühüm tranzit və logistika mərkəzinə çevirib. ABŞ ilə bu sahədə əməkdaşlıq yeni iqtisadi imkanlar açır.
Müdafiə sənayesi sahəsində əməkdaşlığın genişləndirilməsi isə Azərbaycanın milli təhlükəsizlik strategiyasının mühüm tərkib hissəsidir. Yeni səhifənin açılması ölkəmizin müdafiə qabiliyyətinin daha da güclənməsinə xidmət edəcəkdir. II Qarabağ müharibəsində əldə olunmuş tarixi Qələbədən sonra Azərbaycan regionda sülhün və təhlükəsizliyin təminatçısı kimi çıxış edir. Bu mövqenin möhkəmləndirilməsi üçün güclü müdafiə potensialı əsas şərtlərdən biridir.
Xüsusilə diqqətəlayiq məqamlardan biri də süni intellekt və yüksək texnologiyalar sahəsində əməkdaşlıqdır. Müasir dövrdə rəqəmsal transformasiya dövlətlərin inkişaf səviyyəsini müəyyən edən əsas amillərdəndir. Amerikanın aparıcı şirkətləri ilə əməkdaşlıq çərçivəsində süni intellekt mərkəzlərinin yaradılması Azərbaycanın innovativ inkişaf strategiyasının göstəricisidir. Cənab Prezident İlham Əliyevin rəhbərliyi ilə ölkəmiz neft kapitalını insan kapitalına və texnoloji tərəqqiyə yönəldir.
Vitse-prezident Vensin səfəri yalnız siyasi protokol hadisəsi deyil, həm də yeni mərhələnin başlanğıcıdır. İmzalanmış Strateji Xartiya gələcək onilliklər üçün əməkdaşlığın yol xəritəsini müəyyən edir. Bu sənəd Azərbaycanın beynəlxalq sistemdə artan rolunun, güclənən mövqeyinin və qlobal proseslərə təsir imkanlarının təsdiqidir.
Bu gün Azərbaycan sülh şəraitində yaşayır və sülhü möhkəmləndirməyi qarşısına əsas məqsəd qoyub. Ermənistanla normallaşma prosesi və regionda sabitliyin bərqərar olması istiqamətində atılan addımlar Cənab Prezident İlham Əliyevin prinsipial və qətiyyətli siyasətinin nəticəsidir. ABŞ-ın bu prosesə dəstəyi isə beynəlxalq ictimaiyyətin Azərbaycanın mövqeyinə verdiyi qiymətin göstəricisidir. Bütün bunlar sübut edir ki, Cənab Prezident İlham Əliyevin rəhbərliyi ilə Azərbaycan yalnız regionun deyil, daha geniş coğrafiyanın strateji tərəfdaşına çevrilmişdir. Dövlətimizin müstəqil siyasəti, milli maraqlara əsaslanan diplomatiyası və qətiyyətli liderlik modeli ölkəmizi yeni zirvələrə doğru aparır.
İmzalanmış Strateji Xartiya isə bu yüksəlişin növbəti mərhələsinin başlanğıcıdır. Bu sənəd Azərbaycanın güclü dövlət, etibarlı tərəfdaş və söz sahibi olan ölkə kimi beynəlxalq mövqeyini daha da möhkəmləndirir.
Zərdab şəhər sakini Cavid Məmmədov
