Ukraynanın xarici işlər naziri Dmitri Kuleba Almaniyanı Ukraynanın NATO-ya üzvlüyü ilə bağlı müraciətinə mane olmamağa çağırıb.
“Qanunla.az” xəbər verir ki, bu barədə o, ARD kanalına müsahibəsində bildirib.
“Almaniya hökumətini 2008-ci ildə Ukraynanın NATO-ya inteqrasiyasına qarşı açıq şəkildə çıxış edən kansler Merkelin buraxdığı səhvləri təkrarlamamağa çağırıram. Bunun nəticəsi Rusiyanın daha aqressiv davranışı oldu – baxın Gürcüstan, Qərbə düşmənçilik və indi Ukraynaya təcavüz”, – Kuleba deyib.
Onun sözlərinə görə, artıq NATO üzvlərinin böyük əksəriyyəti Ukraynanın Alyansa daha tez qoşulmasını dəstəkləyir.
Qeyd edək ki, 2008-ci ildə NATO-nun Buxarestdə keçirilən sammitində Almaniya və Fransa Ukraynanın NATO-ya üzvlüyünə qarşı çıxış ediblər.
