Soyqırımının 100 illik yubileyi ilə əlaqədar imzalanmış Sərəncam
Azərbaycan xalqının tarixində 1918-ci ilin mart-aprel aylarında baş vermiş hadisələr ən faciəli və ağrılı səhifələrdən biridir. Həmin dövrdə erməni-bolşevik silahlı dəstələri tərəfindən dinc azərbaycanlı əhaliyə qarşı kütləvi qırğınlar törədilmiş, minlərlə insan etnik və dini mənsubiyyətinə görə amansızcasına qətlə yetirilmişdir. Bu hadisələr xalqımıza qarşı həyata keçirilmiş soyqırımı siyasətinin bariz nümunəsi kimi tarixə düşmüşdür.
Tarixi həqiqətlərin uzun müddət lazımi səviyyədə araşdırılmaması və beynəlxalq ictimaiyyətə çatdırılmaması bu faciənin tam şəkildə dərk olunmasına mane olmuşdur. Lakin müstəqillik dövründə Azərbaycan dövləti bu istiqamətdə ardıcıl və məqsədyönlü siyasət həyata keçirməyə başlamışdır. Xüsusilə Azərbaycan xalqına qarşı törədilmiş bütün soyqırımı faciələrini qeyd etmək məqsədi ilə 1998-ci il martın 26-da Ulu Öndər Heydər Əliyev “Azərbaycanlıların soyqırımı haqqında” Fərman imzalamışdır. Sözügedən Fərmanla martın 31-i “Azərbaycanlıların Soyqırımı Günü” elan edilmişdir. Cənab Prezident İlham Əliyev tərəfindən həyata keçirilən tədbirlər tarixi yaddaşın qorunması və bu həqiqətlərin dünyaya çatdırılması baxımından mühüm əhəmiyyət kəsb edir. Bu istiqamətdə mühüm addımlardan biri 2018-ci il yanvarın 18-də imzalanmış “1918-ci il azərbaycanlıların soyqırımının 100 illiyi haqqında” Sərəncamdır. Bu Sərəncam Azərbaycan tarixinin bu faciəli səhifəsinə dövlət səviyyəsində xüsusi diqqətin göstərilməsinin bariz nümunəsidir. Sənədin əsas məqsədi erməni-bolşevik silahlı dəstələrinin azərbaycanlılara qarşı törətdikləri bəşəri cinayətlər barədə həqiqətlərin həm ölkə daxilində, həm də beynəlxalq səviyyədə daha dolğun şəkildə çatdırılmasını təmin etməkdir. Sərəncama əsasən, Azərbaycan Respublikası Prezidentinin Administrasiyasına 1918-ci il soyqırımının yüzüncü ildönümünə həsr olunmuş geniş tədbirlər planının hazırlanması və həyata keçirilməsi tapşırılmışdır. Bu tədbirlər planı çərçivəsində elmi konfranslar, beynəlxalq simpoziumlar, sərgilər və digər maarifləndirici tədbirlər təşkil edilmişdir. Bu tədbirlər yalnız tarixi hadisələrin xatırlanması məqsədi daşımır, eyni zamanda onların mahiyyətinin dərindən araşdırılmasına və geniş auditoriyaya çatdırılmasına xidmət edir. Sərəncamda Azərbaycan Respublikasının Milli Məclisinə soyqırımın 100 illiyi ilə bağlı xüsusi iclasın keçirilməsi tövsiyə edilmişdir. Bu addım parlament səviyyəsində də mövzuya diqqətin artırılmasına və onun siyasi-hüquqi qiymətləndirilməsinə şərait yaratmışdır. Milli Məclisdə keçirilən müzakirələr nəticəsində tarixi faktlar bir daha diqqət mərkəzinə gətirilmiş və ictimaiyyətə çatdırılmışdır.
Bu Sərəncamın əhəmiyyəti yalnız bir yubiley tədbirinin təşkili ilə məhdudlaşmır. O, həm də dövlətin tarixi yaddaşa verdiyi dəyərin göstəricisidir. Tarixi yaddaşın qorunması milli kimliyin və dövlətçilik ənənələrinin yaşadılması baxımından mühüm əhəmiyyət daşıyır. Xalqın başına gətirilmiş faciələrin unudulmaması gələcək nəsillərin bu hadisələrdən nəticə çıxarmasına və milli birlik ruhunun möhkəmlənməsinə xidmət edir.
Prezident cənab İlham Əliyevin rəhbərliyi ilə həyata keçirilən bu siyasət Azərbaycanın beynəlxalq aləmdə də mövqeyini gücləndirir. Tarixi həqiqətlərin dünya ictimaiyyətinə çatdırılması beynəlxalq təşkilatlar və xarici ölkələrdə fəaliyyət göstərən diaspor təşkilatları vasitəsilə həyata keçirilir. Bu fəaliyyət nəticəsində 1918-ci il hadisələri haqqında daha obyektiv və dolğun məlumatların yayılması təmin olunur.
Bu gün Azərbaycan dövləti tarixi həqiqətlərin qorunması və təbliği istiqamətində ardıcıl siyasətini davam etdirir. Bu siyasət həm milli yaddaşın möhkəmləndirilməsinə, həm də beynəlxalq səviyyədə ədalətin bərqərar olunmasına xidmət edir. Tarixi həqiqətlərin unudulmaması isə gələcəkdə daha ədalətli və təhlükəsiz dünyanın qurulmasına töhfə verən əsas amillərdən biridir.
Zərdab rayon Mədəniyyət Mərkəzinin direktoru Elyurə Məmmədova
