Regional təhlükəsizlik Azərbaycan üçün hər zaman bir nömrəli məsələ olub.
Martın 12‑də Bakı şəhərində Nizami Gəncəvi Beynəlxalq Mərkəzinin təşkilatçılığı ilə “Keçid dövründə olan dünyada fikir ayrılıqlarının aradan qaldırılması” mövzusunda XIII Qlobal Bakı Forumunun açılış mərasimində dövlət başçısı Prezident cənab İlham Əliyev dünya nizamının əsas problemlərinə dair dərin məzmunlu çıxış etmişdir. Bu çıxışda regional və qlobal təhlükəsizlik məsələləri xüsusilə vurğulanmışdır. Dövlət başçısı çıxışında qeyd etmişdir ki, müasir dünya sistemində struktur dəyişiklikləri gedir və beynəlxalq münasibətlərin ənənəvi mexanizmləri təzyiqlər altında qalmaqdadır. Bu kontekstdə fikir ayrılıqlarının yalnız dialoq və əməkdaşlıq yolu ilə aradan qaldırılmasının zəruriliyi vurğulanır.
Azərbaycanın mövqeyi, onun sənədlərdə və beynəlxalq platformalarda daim müdafiə etdiyi kimi, regional təhlükəsizlik məsələsi yalnız hərbi məsələlərdən ibarət deyil – o, müxtəlif səviyyələrdə sabitlik, qarşılıqlı etimad, əməkdaşlıq və qarşılıqlı maraqların təmin olunması deməkdir. Bu baxımdan, ölkəmizin təşəbbüsləri yalnız onun ərazi bütövlüyünün müdafiəsi ilə məhdudlaşmır, həm də qonşuluq siyasətində sülhün davamlılığını təmin etməyə yönəlib. Azərbaycanın son dövrlərdə beynəlxalq və regional məsələlərdə fəal rol alması, enerji və nəqliyyat koridorlarının inkişafı, multilateral dialoqa verdiyi önəm, həmçinin sülh prosesi və hərtərəfli əməkdaşlıq təşəbbüsləri ölkənin təhlükəsizlik strategiyasının mərkəzində dayanır. Məhz bu strategiya sayəsində Azərbaycan öz regionunda həm iqtisadi inkişafı təmin edir, həm də qlobal təhlükəsizlik gündəmi ilə daha fəal şəkildə iştirak edir.
Bu gün dünya qeyri‑sabit bir mərhələdən keçir. Böyük dövlətlərarası rəqabət, qlobal tərəfdaşlıq mexanizmlərinin zəifləməsi, yeni təhlükəsizlik çağırışları beynəlxalq sistemə təzyiq göstərir. Forum iştirakçıları ilə danışan Prezident cənab İlham Əliyev Azərbaycanın regional təhlükəsizlik məsələlərinə dair prinsipial mövqeyini bir daha təsdiqləmişdir. Azərbaycan üçün təhlükəsizlik yalnız hərbi qüvvələrin gücləndirilməsi anlamına gəlmir; bu, həm də diplomatiya, iqtisadi əməkdaşlıq, qarşılıqlı hörmət və beynəlxalq hüququn aliliyinə sadiqlik deməkdir.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
