Quba qırğınları.
Tarix yalnız keçmişin xatirəsi deyil, həm də gələcək üçün ibrət dərsidir. 31 Mart – Azərbaycanlıların Soyqırımı Günü bu baxımdan xalqımızın yaddaşında xüsusi yer tutur və XX əsrin əvvəllərində baş vermiş faciələri bir daha xatırladır. Bu faciələr arasında Quba qırğınları öz amansızlığı və miqyası ilə seçilir. 1918-ci ilin yazında baş verən hadisələr zamanı Quba bölgəsi ağır hücumlara məruz qaldı. Silahlı dəstələr tərəfindən həyata keçirilən bu qırğınlar nəticəsində yüzlərlə yaşayış məntəqəsi dağıdıldı, minlərlə dinc sakin – qadınlar, uşaqlar və yaşlılar xüsusi qəddarlıqla qətlə yetirildi. Məqsəd yalnız fiziki məhvetmə deyil, həm də bölgənin etnik tərkibini dəyişmək idi. Quba qəzasında törədilən soyqırımı uzun illər gizli saxlanılsa da, sonrakı dövrlərdə aparılan araşdırmalar bu hadisələrin miqyasını üzə çıxardı. Xüsusilə kütləvi məzarlıqların aşkar edilməsi burada baş verənlərin təsadüfi deyil, planlı şəkildə həyata keçirilmiş bir cinayət olduğunu sübut edir. Bu tapıntılar tarixçilər və tədqiqatçılar üçün mühüm faktoloji baza yaratmaqla yanaşı, dünya ictimaiyyətinə də həqiqətlərin çatdırılmasında böyük rol oynayır.
Quba qırğınları yalnız bir bölgənin faciəsi deyil, bütövlükdə Azərbaycan xalqına qarşı yönəlmiş soyqırımı siyasətinin tərkib hissəsidir. Bu hadisələr milli yaddaşımızda dərin iz qoymaqla yanaşı, gələcək nəsillərə tarixdən dərs çıxarmağın vacibliyini xatırladır. Bu gün Azərbaycanın müxtəlif bölgələrində, o cümlədən Qubada ucaldılmış abidələr və memorial komplekslər həmin qurbanların xatirəsini əbədiləşdirir. Anım mərasimləri, elmi konfranslar və maarifləndirici tədbirlər vasitəsilə bu həqiqətlər həm ölkə daxilində, həm də beynəlxalq səviyyədə daha geniş auditoriyaya çatdırılır.
31 Mart yalnız hüzn günü deyil, həm də tarixi ədalətin bərpası uğrunda mübarizənin rəmzidir. Quba qırğınlarının qurbanlarını yad etmək, onların xatirəsini yaşatmaq və bu faciənin dünya tərəfindən tanınmasına nail olmaq hər birimizin mənəvi borcudur. Tarix unudulmadıqca, belə faciələrin təkrarlanmasına yol verilməyəcək.
Zərdab rayon Gəlmə kənd sakini, gənc fəal-Ziya Tağızadə
