Enerji sahəsində əməkdaşlıq isə Azərbaycan–Avropa İttifaqı münasibətlərinin strateji istiqamətlərindən biridir
Müasir beynəlxalq münasibətlər sistemində dövlətlər arasında tərəfdaşlıq və qarşılıqlı əməkdaşlıq strateji inkişafın əsas sütunlarından biri hesab olunur. Xüsusilə enerji təhlükəsizliyi, iqtisadi tərəqqi və regional sabitliyin ön plana çıxdığı bir dövrdə Azərbaycan ilə Avropa İttifaqı arasında münasibətlərin möhkəmləndirilməsi xüsusi əhəmiyyət kəsb edir. Martın 11-də Bakıda Azərbaycan Respublikasının Prezidenti İlham Əliyev ilə Avropa İttifaqı Şurasının Prezidenti Antonio Koşta arasında keçirilən görüş də bu əməkdaşlığın yeni mərhələyə qədəm qoyduğunu nümayiş etdirdi. Görüş zamanı tərəflər iqtisadiyyat, enerji və regional təhlükəsizlik kimi mühüm sahələr üzrə əməkdaşlığın genişləndirilməsi barədə fikir mübadiləsi aparmış, birgə mətbuat bəyanatı ilə tərəfdaşlığın fəal və dinamik xarakter daşıdığını vurğulamışlar.
Azərbaycan ilə Avropa İttifaqı arasında münasibətlər çoxsəviyyəli dialoq üzərində qurulub. Son dövrlərdə Avropa Komissiyası nümayəndələrinin regiona müntəzəm səfərləri bu əlaqələrin davamlı və inkişaf edən xarakter daşıdığını göstərir. Bu səfərlər siyasi və iqtisadi sahələrdə intensiv dialoqun mövcudluğunu təsdiqləməklə yanaşı, yeni əməkdaşlıq istiqamətlərinin formalaşmasına da zəmin yaradır.
İqtisadi əməkdaşlıq tərəfdaşlığın əsas istiqamətlərindən biridir. 2026-cı ilin yanvar ayına dair statistik məlumatlar göstərir ki, Azərbaycanın xarici ticarət dövriyyəsinin təxminən 50 faizi Avropa İttifaqı ölkələrinin payına düşür. Bu fakt Avropa İttifaqının Azərbaycanın əsas ticarət tərəfdaşlarından biri olduğunu açıq şəkildə nümayiş etdirir. Eyni zamanda qarşılıqlı sərmayələrin artması və yeni iqtisadi layihələrin həyata keçirilməsi tərəflər arasında əməkdaşlığın daha da dərinləşdiyini göstərir. Bu proses yalnız iqtisadi fayda ilə məhdudlaşmır, həm də regionda yeni inkişaf imkanlarının yaranmasına töhfə verir.
Enerji sahəsində əməkdaşlıq isə Azərbaycan–Avropa İttifaqı münasibətlərinin strateji istiqamətlərindən biridir. Xüsusilə 2022-ci ildə Avropa Komissiyası ilə enerji sahəsində Strateji Tərəfdaşlıq haqqında sənədin imzalanması bu sahədə əməkdaşlığın yeni mərhələyə keçdiyini göstərir. Bu gün Avropa İttifaqının 10 üzv dövləti Azərbaycandan təbii qaz alır və ümumilikdə 16 ölkə Azərbaycanın enerji resurslarından faydalanır. Bu göstəricilər Azərbaycanın Avropanın enerji təhlükəsizliyində mühüm tərəfdaş olduğunu bir daha təsdiqləyir.
Enerji sahəsində əməkdaşlığın mühüm platformalarından biri də Cənub Qaz Dəhlizi Məşvərət Şurasının illik toplantılarıdır. Bu görüşlər tərəfdaş ölkələr arasında enerji siyasətinin koordinasiyası və yeni layihələrin müzakirəsi baxımından mühüm əhəmiyyət daşıyır. Bəyanatlarda qeyd olunduğu kimi, yaxın illərdə qaz hasilatının artırılması planlaşdırılır. Yeni yataqların istismara verilməsi nəticəsində növbəti iki-üç il ərzində mövcud həcmlərlə müqayisədə ən azı 10 milyard kubmetr əlavə qaz hasilatı gözlənilir. Bu isə Avropa bazarına enerji tədarükünün daha da genişlənməsinə imkan yaradacaq.
Gülnaz Məmmədova – Zərdab şəhər sakini, təqaüdçü
