Bu gün Cənubi Qafqazda tamamilə yeni vəziyyət yaranmaqdadır.
2026-cı il aprelin 6-da Azərbaycan Respublikasının Prezidenti cənab İlham Əliyev Gürcüstana rəsmi səfəri çərçivəsində mətbuata verdiyi bəyanatda mühüm bir fikri xüsusi vurğuladı: “Bu gün Cənubi Qafqazda tamamilə yeni vəziyyət yaranmaqdadır.” Bu ifadə təkcə diplomatik ritorika deyil, regionda baş verən dərin geosiyasi və iqtisadi transformasiyaların qısa, lakin dəqiq təsviridir. Son illər Cənubi Qafqazda formalaşan yeni reallıqlar ilk növbədə Azərbaycan ilə Ermənistan arasında münasibətlərin normallaşması istiqamətində atılan addımlarla bağlıdır. Uzun illər davam edən qarşıdurmadan sonra bölgədə sülh gündəliyinin aktuallaşması həm regional təhlükəsizliyin möhkəmlənməsinə, həm də əməkdaşlıq imkanlarının genişlənməsinə zəmin yaradır. Bu kontekstdə Azərbaycanın təşəbbüskar rolu və praqmatik siyasəti xüsusi qeyd olunmalıdır.
Prezident İlham Əliyevin Gürcüstana səfəri isə bu yeni mərhələdə strateji tərəfdaşlığın daha da gücləndirilməsi baxımından mühüm əhəmiyyət daşıyır. Gürcüstan ilə Azərbaycan arasında münasibətlər artıq uzun illərdir ki, qarşılıqlı etimad və ortaq maraqlar üzərində qurulub. Enerji, nəqliyyat və logistika sahələrində həyata keçirilən birgə layihələr regionun iqtisadi xəritəsini yenidən formalaşdırır. Xüsusilə Cənub Qaz Dəhlizi kimi qlobal əhəmiyyətli enerji layihələri və Orta Dəhliz təşəbbüsü çərçivəsində reallaşdırılan nəqliyyat marşrutları Cənubi Qafqazı beynəlxalq ticarət və enerji təchizatının əsas qovşaqlarından birinə çevirir. Bu layihələr təkcə iqtisadi deyil, həm də siyasi sabitliyə xidmət edir. Çünki qarşılıqlı asılılıq və əməkdaşlıq mühiti münaqişə risklərini minimuma endirir.
Yeni vəziyyətin digər mühüm xüsusiyyəti region ölkələrinin öz talelərini daha müstəqil şəkildə müəyyən etməyə başlamasıdır. Xarici təsirlərin nisbətən azalması və daxili təşəbbüslərin artması nəticəsində Cənubi Qafqaz ölkələri arasında birbaşa dialoq və əməkdaşlıq daha real və davamlı xarakter alır. Bununla yanaşı, yaranan yeni reallıqlar müəyyən çağırışları da özündə ehtiva edir. Sülh sazişinin yekunlaşdırılması, sərhədlərin delimitasiyası və kommunikasiyaların açılması kimi məsələlər hələ də diqqət mərkəzindədir. Lakin artıq formalaşan siyasi iradə və qarşılıqlı maraqlar bu problemlərin mərhələli şəkildə həll olunacağına ümid yaradır. Prezident İlham Əliyevin səsləndirdiyi fikir əslində gələcəyə yönəlmiş strateji baxışın ifadəsidir. “Yeni vəziyyət” anlayışı yalnız mövcud dəyişiklikləri deyil, həm də qarşıda açılan imkanları ehtiva edir. Bu imkanlardan səmərəli istifadə isə region ölkələrinin siyasi uzaqgörənliyindən və əməkdaşlıq əzmkarlığından asılı olacaq.
Zərdab rayon Gəlmə kənd tam orta ümumtəhsil məktəbinin direktoru-Rasif Qaçayev
