Bölgənin enerji ehtiyatlarından səmərəli istifadə
Kəlbəcər rayonunun işğaldan azad edilməsi bölgənin enerji potensialının yenidən iqtisadi dövriyyəyə qaytarılması üçün geniş imkanlar açdı. Azərbaycanın su ehtiyatları baxımından ən zəngin bölgələrindən olan Kəlbəcər uzun illər ərzində təbii sərvətlərinin istismarı baxımından böyük itkilərlə üzləşmişdi. Lakin 2020-ci il Vətən müharibəsindən sonra həyata keçirilən bərpa və yenidənqurma proqramları çərçivəsində rayonun hidroenerji imkanlarının səmərəli istifadəsi dövlətin prioritet istiqamətlərindən birinə çevrildi. Bu gün Kəlbəcərdə tikilən və tam bərpa olunan Kiçik Su Elektrik Stansiyaları həm regionun enerji təminatında, həm də ümumilikdə ölkənin “yaşıl enerji” strategiyasında mühüm rol oynayır. Rayonda həyata keçirilən enerji layihələri həm güc baxımından, həm də texniki imkanlarına görə yüksək əhəmiyyət daşıyır. Tərtər çayının sol qolu olan Meydan çayı üzərində olan su elektrik stansiyasının tam yenidən qurulması bölgənin enerji istehsalına verdiyi töhfənin bariz nümunəsidir. Bu stansiyanın işə düşməsi həm yerli ehtiyacları qarşılayır, həm də ümumi enerji şəbəkəsinin dayanıqlığını artırır. Bu stansiyalar Kəlbəcərin sərt dağlıq relyefində etibarlı enerji istehsalını təmin etməklə yanaşı, bölgənin iqtisadi həyatının dirçəlməsinə də təkan verir.
Kəlbəcər rayonunda yeni tikilən enerji obyektləri də xüsusi qeyd olunmalıdır. Dövlətin “yaşıl enerji zonası” konsepsiyasına uyğun olaraq burada 8,6 meqavatlıq “Aşağı Vəng”, 8,8 meqavatlıq “Nadirxanlı” və 5 meqavatlıq “Çaykənd” kiçik su elektrik stansiyaları inşa edilib. Bu layihələrin icrası həm regionun özünütəminetmə imkanlarını artırır, həm də Azərbaycanın ümumi enerji strategiyasına mühüm töhfə verir. Sözügedən stansiyalar ətraf mühitə minimal təsirlə enerji istehsal edir, ekoloji davamlılıq prinsiplərini qoruyur və su ehtiyatlarının rasionallaşdırılmasına şərait yaradır.Bütün bu enerji layihələri Kəlbəcərin iqtisadi inkişafında mühüm rol oynayır. Yeni infrastruktur həm məskunlaşma prosesini sürətləndirir, həm də kənd və şəhərlərin bərpası üçün zəruri enerji təminatını yaradır. Kəlbəcərin su enerjisi potensialından səmərəli istifadə olunması Azərbaycanın enerji təhlükəsizliyinin möhkəmləndirilməsi, alternativ enerji mənbələrinin genişləndirilməsi və işğaldan azad edilmiş ərazilərin davamlı inkişafına xidmət edən strateji addım kimi qiymətləndirilir.
Zərdab rayon Salahlı kənd ümumi orta ümumtəhsil məktəbinin direktoru-Rəşad İsmayılov
