Biz iqtisadi sahədə böyük uğurlar əldə etmişik.
2026-cı il aprelin 6-da cənab Prezident İlham Əliyevin Gürcüstana rəsmi səfəri çərçivəsində verdiyi bəyanat Azərbaycan–Gürcüstan münasibətlərinin dinamik inkişafını bir daha nümayiş etdirdi. Bu səfər iki qonşu ölkə arasında iqtisadi, siyasi və strateji əməkdaşlığın yeni mərhələyə qədəm qoyduğunu göstərən mühüm hadisədir.
Azərbaycan və Gürcüstan arasında münasibətlər uzun illərdir ki, qarşılıqlı etimad və tərəfdaşlıq prinsiplərinə əsaslanır. Xüsusilə enerji, nəqliyyat və logistika sahələrində həyata keçirilən birgə layihələr regionun iqtisadi xəritəsini dəyişdirərək hər iki ölkənin beynəlxalq əhəmiyyətini artırmışdır. Bu baxımdan, görüşlər zamanı iqtisadi əməkdaşlığın daha da genişləndirilməsi məsələlərinin müzakirə olunması xüsusi əhəmiyyət daşıyır.
Dövlət başçısının bəyanatında vurğulandığı kimi, iqtisadi əlaqələr davamlı artım tempinə malikdir: “Keçən il bizim ticarət dövriyyəmiz 800 milyon dollardan çox olmuşdur və bu ilin ilk rübündə yenə də artım kifayət qədər yüksəkdir. Belə gedərsə, biz bəlkə də ilin sonuna qədər bir milyard rəqəminə də çatacağıq. Gürcüstanda mövcud olan çox müsbət sərmayə iqlimi Azərbaycan investorlarını da həvəsləndirir və bu günə qədər Azərbaycan tərəfindən Gürcüstan iqtisadiyyatına 3,7 milyard dollar sərmayə qoyulmuşdur. Biz bu gün həm Azərbaycan, həm də Gürcüstan üçün yeni investisiya layihələri haqqında fikir mübadiləsi aparmışıq və nə vaxtsa üçüncü ölkələrə də birgə sərmayə qoyuluşu nəzərdə tutula bilər”. Bu fikirlər iki ölkə arasında iqtisadi əməkdaşlığın yalnız mövcud səviyyə ilə məhdudlaşmadığını, eyni zamanda gələcəyə yönəlmiş strateji planların da formalaşdırıldığını göstərir. Xüsusilə qarşılıqlı investisiyaların artması və üçüncü ölkələrdə birgə layihələrin həyata keçirilməsi təşəbbüsü regional əməkdaşlığın coğrafiyasını genişləndirə bilər.
Gürcüstanda formalaşmış əlverişli investisiya mühiti Azərbaycan sahibkarlarının bu ölkəyə marağını artıran əsas amillərdən biridir. Azərbaycan investisiyaları əsasən enerji, infrastruktur, bank sektoru və xidmət sahələrini əhatə edir. Bu isə öz növbəsində Gürcüstan iqtisadiyyatının inkişafına töhfə verməklə yanaşı, Azərbaycan üçün də yeni iqtisadi imkanlar yaradır.
Bundan əlavə, iki ölkə arasında həyata keçirilən iri layihələr – xüsusilə nəqliyyat dəhlizləri və enerji marşrutları – Avropa ilə Asiyanı birləşdirən mühüm körpü rolunu oynayır. Bu layihələr yalnız iqtisadi deyil, həm də geosiyasi baxımdan regionun əhəmiyyətini artırır.
Cənab Prezident İlham Əliyevin Gürcüstana səfəri və səsləndirdiyi fikirlər Azərbaycan–Gürcüstan münasibətlərinin yüksələn xətt üzrə inkişaf etdiyini bir daha təsdiqləyir. Qarşılıqlı sərmayələrin artması, ticarət dövriyyəsinin genişlənməsi və yeni layihələrin müzakirəsi iki ölkənin gələcək əməkdaşlıq perspektivlərinin olduqca geniş olduğunu göstərir.
Rüxsarə Eminova – Zərdab rayonu Körpükənd kənd tam orta ümumtəhsil məktəbinin direktoru
