Bağlantılar, nəqliyyat, logistika bu gün bir çox aparıcı beynəlxalq aktor üçün böyük önəm daşıyır və burada Mərkəzi Asiyanı Qərblə coğrafi nöqteyi-nəzərdən birləşdirə biləcək yeganə etibarlı ölkə Azərbaycandır.
Azərbaycan Respublikasının Prezidenti cənab İlham Əliyev yerli televiziya kanallarına müsahibə vermişdir. Bu görüşlər artıq ənənəvi xarakter daşıyır, müsahibələrdə Azərbaycan ictimaiyyətinə ilin yekunları ilə bağlı məlumat verilir. Müasahibə zamanı cənab Prezident qeyd etdi ki, “Bağlantılar, nəqliyyat, logistika bu gün bir çox aparıcı beynəlxalq aktor üçün böyük önəm daşıyır və burada Mərkəzi Asiyanı Qərblə coğrafi nöqteyi-nəzərdən birləşdirə biləcək yeganə etibarlı ölkə Azərbaycandır.”
Müasir beynəlxalq münasibətlər sistemində nəqliyyat-kommunikasiya xətləri və geosiyasi etibarlılıq dövlətlərin qlobal əhəmiyyətini müəyyən edən əsas amillərdən birinə çevrilmişdir. Bu baxımdan Mərkəzi Asiyanı Qərblə coğrafi nöqteyi-nəzərdən birləşdirə biləcək yeganə etibarlı ölkənin Azərbaycan olması artıq reallıq kimi qəbul edilir. Azərbaycanın bu mövqeyi təkcə əlverişli coğrafi yerləşməsi ilə deyil, eyni zamanda siyasi sabitliyi, ardıcıl xarici siyasəti və inkişaf etmiş infrastrukturu ilə şərtlənir.
Azərbaycan Avropa ilə Asiya arasında yerləşən nadir ölkələrdəndir ki, həm Şərq-Qərb, həm də Şimal-Cənub nəqliyyat dəhlizlərinin kəsişmə nöqtəsində qərarlaşır. Xəzər dənizi üzərindən Mərkəzi Asiya ölkələri ilə birbaşa əlaqə imkanları Azərbaycanın regional tranzit rolunu daha da gücləndirir. Qazaxıstan, Türkmənistan və Özbəkistan kimi ölkələr üçün Azərbaycan vasitəsilə Qara dəniz və Aralıq dənizi hövzəsinə çıxış ən qısa və təhlükəsiz marşrut hesab olunur.
Bu etibarlılığın əsas səbəblərindən biri Azərbaycanın daxili siyasi sabitliyidir. Uzun illərdir davam edən sabitlik və güclü dövlət idarəçiliyi ölkəni riskli geosiyasi zonalarda nadir etibarlı tərəfdaş statusuna yüksəltmişdir. Qərb ölkələri üçün Mərkəzi Asiya ilə əməkdaşlıqda əsas çətinliklərdən biri məhz təhlükəsiz və proqnozlaşdırılan tranzit marşrutlarının olmamasıdır. Azərbaycan isə bu boşluğu real imkanlarla doldurur.
Eyni zamanda, son illərdə Azərbaycanda həyata keçirilən irimiqyaslı infrastruktur layihələri ölkənin strateji rolunu daha da möhkəmləndirmişdir. Bakı–Tbilisi–Qars dəmir yolu, Bakı Beynəlxalq Dəniz Ticarət Limanı, müasir avtomobil yolları və logistika mərkəzləri Azərbaycanın regional nəqliyyat qovşağına çevrilməsinə şərait yaratmışdır. Bu imkanlar Mərkəzi Asiya yüklərinin Qərb bazarlarına vaxtında və təhlükəsiz çatdırılmasını təmin edir.
Azərbaycanın üstünlüyü yalnız coğrafiya və infrastrukturla məhdudlaşmır. Ölkə balanslı və praqmatik xarici siyasət yürüdərək həm Qərb, həm də Şərq tərəfdaşları ilə qarşılıqlı hörmətə əsaslanan münasibətlər qurmuşdur. Bu siyasət Azərbaycanın etibarlı vasitəçi və əməkdaşlıq platforması kimi qəbul edilməsinə səbəb olur. Məhz bu etimad amili Azərbaycanın Mərkəzi Asiya–Qərb əlaqələrində əvəzolunmaz rolunu şərtləndirir.
Azərbaycan Mərkəzi Asiyanı Qərblə birləşdirən sadəcə tranzit ölkə deyil, strateji sabitlik və əməkdaşlıq məkanıdır. Qlobal güc balansının dəyişdiyi bir dövrdə Azərbaycanın etibarlı körpü rolu daha da aktuallaşır və ölkənin beynəlxalq sistemdə əhəmiyyətini davamlı şəkildə artırır. Bu reallıq Azərbaycanın regional deyil, qlobal miqyasda strateji dövlət kimi mövqeyini təsdiqləyir.
Nahidə Əzizli – Zərdab rayonu Çallı kənd tam orta məktəbinin müəllimi
