Azərbaycanı və Vyetnamı yarım əsrdən artıq tarixə malik dostluq münasibətləri birləşdirir.
Azərbaycan ilə Vyetnam arasında mövcud olan dostluq və əməkdaşlıq münasibətləri yarım əsrdən artıq bir dövrü əhatə edir. Bu münasibətlər dərin tarixi köklərə, qarşılıqlı hörmətə və səmərəli əməkdaşlığa əsaslanır. İki ölkə arasındakı əlaqələrin əsasını qoyan ilk mühüm hadisələrdən biri 1959-cu ildə baş verib. Həmin il Vyetnam Demokratik Respublikasının Prezidenti Ho Şi Min Azərbaycan SSR-ə tarixi bir səfər edib. Bu səfər təkcə rəsmi xarakter daşımayıb, eyni zamanda xalqlar arasında mənəvi yaxınlığın və dostluğun göstəricisi olub.
Azərbaycan xalqının Ümummilli Lideri Heydər Əliyevin 1983-cü ildə Vyetnama etdiyi səfər isə iki ölkə arasında münasibətlərin daha da möhkəmlənməsində əhəmiyyətli rol oynayıb. O dövrdə SSRİ Nazirlər Soveti sədrinin birinci müavini vəzifəsində çalışan Heydər Əliyevin bu səfəri, qarşılıqlı etimadın və əməkdaşlığın yüksək səviyyədə olduğunu bir daha təsdiqləyib. Bu əlamətdar görüşlər və dialoqlar, sonrakı onilliklər ərzində Azərbaycan-Vyetnam münasibətlərinin strateji əsaslar üzərində inkişafına güclü təkan verib.
Müstəqillik illərində də bu əlaqələr unudulmayıb, əksinə daha da genişlənib. Diplomatik münasibətlərin yenidən qurulması, iqtisadi və mədəni sahələrdə əməkdaşlıq, eləcə də beynəlxalq təşkilatlar çərçivəsində qarşılıqlı dəstək, bu dostluğun davamlı və möhkəm olduğunu göstərir.
Azərbaycan və Vyetnam, bir-birindən coğrafi baxımdan uzaq olsalar da, ortaq dəyərlər və tarixi xatirələr onları birləşdirir. Hər iki xalqın azadlıq, müstəqillik və inkişaf uğrunda apardığı mübarizə, qarşılıqlı anlaşma və hörmət prinsiplərinə əsaslanan bu əlaqələrin dəyərini daha da artırır.
Bugünkü şəraitdə, iki ölkə arasında ticarət, təhsil, mədəniyyət və enerji sahələrində əməkdaşlıq perspektivləri genişlənməkdədir. Bu isə onu göstərir ki, əsası keçmişdə qoyulmuş dostluq münasibətləri gələcəyə yönəlmiş möhkəm körpüdür.
Gəncliyə Dəstək İctimai Birliyinin Sədri Vəfa Xəlili
