“AZƏRBAYCAN GƏNCLİYİ TARİXİMİZİN QÜDRƏTLİ DÖVRÜNÜN MÜƏLLİFİNƏ ÇEVRİLDİ”
Qanunla.Az xəbər verir ki, 2 fevral Gənclər günü münasibətilə Zərdab rayon Heydər Əliyev Mərkəzinin və Gənclərin İnkişaf və Karyera Mərkəzinin birgə təşkilatçılığı ilə bir qrup vətən müharibəsi iştirakçıları və istedadlı, ictimai fəal olan gənclər ilə görüş-tədbir keçirilib.
Tədbirdə Zərdab rayon Heydər Əliyev Mərkəzinin, Gənclər və İdman idarəsinin, Zərdab rayon Uşaq və Ailələrə Dəstək Mərkəzinin, Mədəniyyət müəssisələrinin əməkdaşları, Gənclərin İnkişaf və Karyera Mərkəzinin Zərdab rayon nümayəndəliyinin rəhbəri Vüsal Yusifov, söz ustası,sənətkar Namiq Atəş və digər qonaqlar iştirak ediblər.
Tədbir iştirakçıları ilk öncə Mərkəzdə nümayiş olunan Zərdab rayon sakini, Zərdab rayon Uşaq və Ailələrə Dəstək Mərkəzinin əməkdaşı, gənc rəssam Bünyamin Məhəmmədovun rəsmlərindən ibarət sərgi ilə tanış olublar. Sərgi tədbir iştirakçıları tərəfindən maraqla qarşılanmışdır.
Tədbirdə Ulu öndər Heydər Əliyevin, eləcə də Azərbaycanın ərazi bütövlüyü və müstəqilliyi uğrunda şəhid olanların xatirəsi ehtiramla yad edilib.
Tədbiri giriş sözü ilə açan Zərdab rayon Heydər Əliyev Mərkəzinin direktoru Könül Rəhimova tədbir iştirakçılarını və bütün Azərbaycan gənclərini 2 fevral Gənclər günü münasibətilə təbrik edib və hər birinə ən səmimi arzularını bildirib.
Könül xanım ölkə başçısı cənab İlham Əliyevin Ulu Öndərin gənclər siyasətini uğurla davam etdirməsini vurğulamış, gələcəyin qurucuları olan bu nəslin vətənpərvərlik, azərbaycançılıq, dövlətçilik ruhunda tərbiyə olunması üçün gördüyü işləri diqqətə çatdırmışdır.
Gənclərin İnkişaf və Karyera Mərkəzinin Zərdab nümayəndəliyinin direktoru Vüsal Yusifov “Gənclər Günü”nün 25 ildir ki, qeyd edildiyini diqqətə çatdırıb. Bildirib ki, Azərbaycanda gənclərin inkişaf etdirilməsi üçün mühüm işlər görülür. “Gənclər üçün Prezident Mükafatı” təsis edilib: “Prezident İlham Əliyev, həmçinin bu il Azərbaycan gəncliyinin perspektiv inkişafı baxımından strateji əhəmiyyət kəsb edən “2015-2025-ci illərdə Azərbaycan gənclərinin İnkişaf Strategiyası”nın təsdiq edilməsi haqqında sərəncam imzaladı”-deyə qeyd edib.
Tədbir zamanı Zərdab rayon Mərkəzləşdirilmiş Kitabxana Sisteminin 1 saylı şəhər kitabxana filialının kitabxanaçısı Məmmədli Fəridə pianoda biri-birinin ardınca vətənpərvərlik və gənclik nəğmələri ifa edib.
Zərdab rayon Mədəniyyət Mərkəzinin Bəyimli qəsəbə Diyarşünaslıq klubunun əməkdaşı Vasif Dəmirlinin ifa etdiyi təsnif və nəğmələr tədbir iştirakçılarının musiqi zövqünü oxşadı.
Zərdab rayon Mərkəzləşdirilmiş Kitabxana Sisteminin əməkdaşı, söz ustası, sənətkar Namiq Atəş Azərbaycan poeziyasında təbiət və gəncliyin əsrarəngiz gözəlliklərini, həmçinin Vətənin təbii, müqəddəs torpağı, ulu dağları, axar çayları, sirli meşələri, istənilən səviyyədə, yetərincə təsvir və tərənnüm olunan şerləri ilə tədbirə gözəllik bəxş edib.
Tədbirdə çıxış edən Zərdab rayon Gənclər və İdman İdarəsinin əməkdaşı Ələkbər Kərimov cəmiyyətin inkişafında təhsilin böyük əhəmiyyətə malik olduğunu diqqətə çatdırıb: “Azərbaycan dövləti təhsilə xüsusi əhəmiyyət verir. Ölkəmizdə təhsilin inkişaf etdirilməsi üçün ardıcıl işlər görülür. Bu mənada gənclərin yüksək təhsil alması, yüksək bilikli vətəndaş kimi formalaşması onların dayanıqlı inkişafında mühüm rol oynayır. Bu baxımdan işğaldan azad edilmiş ərazilərimizdə təhsil infrastrukturunun bərpa olunması müsbət nəticələrini göstərəcək. Biz gənclərimizin Vətən müharibəsindəki şücaətinin şahidi olduq. Bu, o deməkdir ki, Azərbaycan gəncliyi yüksək vətənpərvərlik ruhunda formalaşıb”.
Tədbirdə iştirak edən Vətən müharibəsi iştirakçısı olan Zərdablı gənclər çıxış edərək bu gün müstəqil Azərbaycan dövlətində onlara göstərilən qayğıdan, hər bir sahədə dövlətin dəstəyini hiss etdiklərini söyləmişlər.
Tədbirin sonunda Zərdab rayon Heydər Əliyev Mərkəzinin rəhbərliyi tərəfindən gənclərə hədiyyələr təqdim edilib.
Vüqar Rəhimov
