Avtomobil yollarının inşası geniş vüsət almışdır
Azərbaycanın işğaldan azad edilmiş ərazilərində həyata keçirilən bərpa və yenidənqurma siyasətinin əsas istiqamətlərindən biri avtomobil yollarının və ümumi infrastrukturun qurulmasıdır. Uzun illər ərzində baxımsız qalmış, dağıdılmış və tamamilə yararsız vəziyyətə salınmış bu ərazilər bu gün genişmiqyaslı tikinti və inkişaf mərhələsinə qədəm qoyub. Yol infrastrukturu isə bu prosesin təməl sütunlarından biri kimi çıxış edir. Çünki yollar yalnız nəqliyyat vasitəsi deyil, iqtisadi inkişafın, sosial rifahın və ərazi bütövlüyünün real təminatçısıdır. Hazırda azad edilmiş ərazilərdə həm magistral, həm şəhərlərarası, həm də kənd yollarının inşası paralel şəkildə və böyük vüsətlə aparılır. Bu yollar regionun əsas yaşayış məntəqələrini bir-biri ilə əlaqələndirməklə yanaşı, onları ölkənin ümumi yol şəbəkəsinə inteqrasiya edir. Yeni çəkilən magistral yollar müasir standartlara cavab verir, təhlükəsizlik və rahatlıq baxımından yüksək keyfiyyətlə inşa olunur. Bu isə gələcəkdə iqtisadi aktivliyin artmasına, yük və sərnişin daşımalarının səmərəliliyinə mühüm töhfə verir.
Şəhərlərarası yollarla yanaşı, kənd yollarının inşasına da xüsusi diqqət yetirilir. Çünki kəndlərdə həyatın bərpası, keçmiş məcburi köçkünlərin doğma yurdlarına qayıdışı üçün ilk növbədə etibarlı yol infrastrukturu vacibdir. Yeni yollar kənd təsərrüfatı məhsullarının bazarlara çıxarılmasını asanlaşdırır, əhalinin sosial xidmətlərə çıxışını genişləndirir və regionlarda məşğulluğun artmasına şərait yaradır. Bu baxımdan yol tikintisi yalnız texniki layihə deyil, eyni zamanda sosial layihə kimi də qiymətləndirilir.
Avtomobil yollarının inşası digər infrastruktur sahələrinin inkişafı ilə paralel şəkildə həyata keçirilir. Hazırda işğaldan azad edilmiş ərazilərdə elektrik enerjisi təminatı, generasiya güclərinin yaradılması, ötürücü xətlərin çəkilməsi, körpülərin və tunellərin inşası geniş şəkildə davam edir. Elektrik enerjisi sahəsində həyata keçirilən layihələr regionun dayanıqlı enerji təminatını formalaşdırmaqla yanaşı, alternativ və “yaşıl enerji” potensialının da reallaşdırılmasına xidmət edir.
Körpülər və tunellər yeni yol şəbəkəsinin mühüm tərkib hissəsidir. Dağlıq və çətin relyefə malik ərazilərdə inşa olunan bu obyektlər nəqliyyatın fasiləsizliyini təmin edir, məsafələri qısaldır və təhlükəsizliyi artırır. Müasir mühəndislik həlləri əsasında tikilən bu infrastruktur obyektləri uzunmüddətli istismar üçün nəzərdə tutulur və regionun inkişaf perspektivlərini daha da genişləndirir.
Su təchizatı və qazlaşma layihələri də yol və enerji infrastrukturu ilə vəhdət təşkil edir. Yeni yollar su və qaz xətlərinin çəkilməsini asanlaşdırır, yaşayış məntəqələrinin kommunal təminatını sürətləndirir. Uzun illər işğal altında qalmış ərazilərdə bu sahələrin demək olar ki, sıfırdan qurulması həyata keçirilir. İçməli su sistemləri, kanalizasiya xətləri, qaz kəmərləri müasir standartlara uyğun şəkildə inşa edilir və əhalinin rahat yaşayışı üçün əsas şərait yaradılır.
Bütün bu layihələr vahid bir strategiyanın tərkib hissəsidir. Məqsəd yalnız ayrı-ayrı obyektlərin tikintisi deyil, azad edilmiş ərazilərin ölkənin ümumi infrastruktur şəbəkəsinə tam inteqrasiyasıdır. Bu inteqrasiya iqtisadi baxımdan regionların inkişafını sürətləndirir, sosial baxımdan əhalinin geri dönüşünü stimullaşdırır, strateji baxımdan isə ölkənin təhlükəsizliyini və ərazi bütövlüyünü möhkəmləndirir.
Bu gün azad edilmiş torpaqlarda aparılan tikinti-quruculuq işləri həmin ərazilərin tədricən dirçəlməsini və həyata qayıtmasını təmin edir. Bir vaxtlar viran qalmış şəhər və kəndlərdə indi yollar salınır, işıq yanır, su və qaz xətləri çəkilir. Bu mənzərə yalnız fiziki bərpa deyil, eyni zamanda milli iradənin, dövlət gücünün və gələcəyə olan inamın təzahürüdür.
Yol çəkilən hər bir ərazi inkişaf yoluna qədəm qoyur və bu yol Azərbaycanı daha güclü, daha dayanıqlı gələcəyə aparır.
Zərdab rayon Həsən bəy Zərdabi muzeyinin direktoru Vəfa Bayramova
