Avqustun 8-də Vaşinqtonda baş verən hadisələr qarşıdurmanın və gərginliyin sonu deməkdir.
Cənab Prezident İlham Əliyev “Əl-Ərəbiyyə” telekanalına müsahibə verərkən olduqca mühüm məqamlara diqqət çəkdi. Ölkə başçısı çıxışı zamanı regional məsələlərlə yanaşı beynəlxalq əhəmiyyət kəsb edən məsələlərə toxundu və Azərbaycanın beynəlxalq aləmdə, dünya siyasətindəki rolu və əhəmiyyətini dünya ictimaiyyətinə çatdırdı. Cəan Prezident İlham Əliyev müsahibəsi zamanı Vaşinqtonda baş vermiş görüşün detalları barədə xüsusi olaraq fikir bildirdi. Son zamanlar təkcə Azərbaycan və Ermənistan ictimaiyyətində deyil ümumiyyətlə dünyada Vaşinqton görüşünün nəticələri böyük maraqla gözlənilir və müzakirə olunur. Vaşinqtonda əldə olunmuş razılıq barədə jurnalistin sualını cavablayan Cənab Prezident İlham Əliyev qeyd etdi ki, uzun illərdir ki, biz Ermənistanla müharibə vəziyyətində idik. Məhz Ermənistan 1990-cı illərin əvvəlindən Azərbaycan ərazilərini işğal etmişdir. O zaman Azərbaycan çox zəif idi, ordumuz yox idi. Ermənistanın isə Azərbaycan ərazilərini işğal etməkdə ona dəstək göstərən xarici tərəfdarları var idi. Beləliklə, ərazimizin təxminən 20 faizi onlar tərəfindən işğal edilmişdi, nəticədə bir milyon qaçqın və məcburi köçkünümüz var idi. Həmin dövrdə bu, əhalinin sayına görə dünyada ən yüksək nisbətlərdən biri idi. Azərbaycan əhalisi o vaxt 8 milyon nəfər idi, onların bir milyonu yurd-yuvasından didərgin düşmüşdü. Birinci Qarabağ müharibəsi 1994-cü ildə atəşkəslə başa çatdı və biz 2020-ci ilə qədər davam edən sonsuz və mənasız danışıqlar prosesində iştirak etdik. 2020-ci ildə isə ikinci Qarabağ Müharibəsi başladı və biz beynəlxalq səviyyədə tanınmış ərazilərimizi bərpa etdik. Avqustun 8-də Vaşinqtonda baş verən hadisələr qarşıdurmanın və gərginliyin sonu deməkdir.
Müsahibənin gedişi prosesində Cənab Prezident bildirdi ki, Vaşinqtonda sənədlərin kim tərəfindən imzalanmasından asılı olmayaraq, onlar Ermənistanın adından Ermənistan lideri tərəfindən imzalanıb.
Ümumi olaraq Cənab Prezident müsahibəsi zamanı ölkəmiz və regionumuz, dünyamız üçün olduqca vacib məsələlərdən olan Zəngəzur Dəhlizinin açılması, Minsk qrupunun ləğvi, Suriya-İsrail münasibətlərinin formalaşması, Azərbaycan Respublikasının qlobal müstəvidə əhəmiyyətinin artması və bu kimi digər məsələlərə toxundu ki, heç şübhəsiz vurğulaya bilərik ki, çox qısa zamanda bu məsələlərin hər biri öz həllini tapacaqdır.
- Zərdabi adına Əlvənd kənd tam orta məktəbinin direktoru E. Xəlilov.
