44 günlük Vətən müharibəsi nəticəsində Azərbaycan ədaləti, beynəlxalq hüququ və öz ləyaqətini bərpa etdi, torpaqlarını geri qaytardı
Prezident cənab İlham Əliyevin Səudiyyə Ərəbistanının nüfuzlu “Əl-Ərəbiyyə” telekanalına verdiyi müsahibə xüsusi əhəmiyyət daşıyır. Müsahibədə ölkə Prezidenti sülh gündəliyi, Zəngəzur dəhlizi və TRIPP layihəsi, Qarabağda bərpa işləri və beynəlxalq tərəfdaşlıq mövzularında mühüm mesajlar səsləndirdi. Prezident cənab İlham Əliyev müsahibədə vurğulayıb ki, Azərbaycan və Ermənistan arasında sülh müqaviləsinin imzalanması bölgədə davamlı sabitliyin və inkişafın təmin olunması baxımından həyati əhəmiyyət daşıyır. Dövlətimizin başçısı bildirib ki, bu müqavilənin əldə edilməsi üçün əsas şərt Ermənistanın Konstitusiyasında Azərbaycanın ərazi bütövlüyünə zidd müddəaların aradan qaldırılmasıdır.
Azərbaycan və Ermənistan rəhbərlərinin Vaşinqtonda birgə imzaladığı Bəyannamə regionda yeni siyasi vəziyyətin formalaşmasına zəmin yaradır. Ağ Evdə baş tutan görüş yalnız iki ölkə arasında deyil, bütün Cənubi Qafqazın taleyində həlledici dönüş nöqtəsi kimi yadda qaldı. Dövlətimizin başçısı müsahibəsində vurğulayıb: “Təqribən beş il bundan əvvəl 44 günlük Vətən müharibəsi nəticəsində Azərbaycan ədaləti, beynəlxalq hüququ və öz ləyaqətini bərpa etdi, torpaqlarını geri qaytardı. Bundan sonra prosesdə müəyyən bir boşluq yarandı, çünki o zaman vasitəçilər artıq hansı addımı atmalı olduqlarını bilmirdilər və məhz Azərbaycan Ermənistanla sülh prosesinə başlamağı təklif etdi. Yenə də məhz biz danışıqlar formatının təşəbbüskarı olduq. Biz sülh sazişinin layihəsini təqdim etdik. Əslində, avqustun 8-də Vaşinqtonda paraflanmış sənəd Ermənistan-Azərbaycan münasibətlərinin dövlətlərarası çərçivədə necə qurulmalı olduğu barədə Azərbaycanın baxışına əsaslanır. Qeyd etdiyim kimi, danışıqlar bir neçə il davam etdi və nəhayət Vaşinqtonda Prezident Trampın və onun komandasının böyük dəstəyi ilə başa çatdı. Mən hesab edirəm ki, bu, münaqişənin, müharibənin sonudur”.
2025-ci ilin avqust ayında Prezident cənab İlham Əliyevin ABŞ-a rəsmi səfəri və bu çərçivədə Ermənistanla imzalanan sülh sazişi Cənubi Qafqazda və daha geniş geosiyasi məkanda mühüm dönüş nöqtəsi olub. Bu hadisə Azərbaycan-Amerika münasibətlərinin strateji tərəfdaşlıq səviyyəsinə yüksəlməsi və uzunmüddətli münaqişənin diplomatik yolla həllinə doğru atılan əhəmiyyətli addım kimi qiymətləndirilir.
Prezident cənab İlham Əliyevin Ərəbistanının “Əl-Ərəbiyyə” telekanalına müsahibəsində səsləndirdiyi fikirlər, verdiyi mesajlar bir daha Azərbaycanın qalib, qüdrətli, hər zaman qətiyyətli, prinsipial və beynəlxalq hüquqa əsaslanan mövqeyi olan, dünyada nüfuzlu, söz sahibi olan dövlətlərdən biri olduğunun təsdiqidir.
Zərdab rayon Tarix-Diyarşünaslıq muzeyinin direktoru Şahnaz Mustafayeva
